„Бегалка“ премиерно на затворањето на Денови на комедија

Со оваа претстава ќе  бидат затворени годинешниве Деновите на комедија во Куманово.

Режисерот Ѓорѓи Ристевски, вели дека драмата е работена според истата структура и "принципи" на текстот на Васил Иљоски, но на посовремен начин. Смета дека направиле претстава на која можат да бидат горди и публиката да ужива во неа.

„Нашата "Бегалка" како тема не ја обработува само бегалката која бега затоа што не и` е остварена љубовта, туку затоа што бега и од едно цело општество. Мислам дека можеме да сме горди и да уживаме во неа. Нашата бегалка бега од еден систем кој и забранува да живее и да постои како што сака таа, а и тоа беше целата идеја: дека можеби од денешен аспект, треба да се занимаваме со тоа што го сакаме и да го оствариме тоа што го сакаме во нашиот живот и да успееме да живееме како што сакаме. Затоа што сепак еднаш се живее. А храброста којашто ја имаше бегалката да побегне, всушност треба да не' поттикне и нас да размислиме како би сакале и што би сакале да направиме во животот“,- рече режисерот Ристевски на денешната прес конференција.

Тој, се заблагодари и на продуценскиот и на уметничкиот тим за соработката и додаде дека во оваа драма работел ким кој го сака и живее за театарот.

Улогата на Бошко ја игра Марко Трајковиќ, а  Ленче Кумановче  младата актерка Владанка Димковска, која вели дека растела со приказната за Ленче и Бошко и токму затоа оваа улога како кумановка и е особено важна и значајна.

„Ова беше многу убав процес, еден од поубавите во коишто сум учествувала, бидејќи навистина се живееше и се работеше театарот, во вистинска смисла на зборот со цела енергија и желба оваа претстава да ја проживееме на сцената. По малку и сум уплашена, бидејќи одговорноста е голема. Сепак, направивме една Бегалка која покажува дека на крајот доброто е најважното, дека љубовта е мотив и дека треба да се бориме за тоа што го сакаме, затоа што само така вреди да се живее“- рече и Димковска.

И директорот на Центарот за култура Сашо Тодоровски е задоволен од она што го видел на пробите, и смета дека станува збор за една интересна и магична претстава која ќе се игра долго во театар Куманово.

Во претставата ќе играат актерите: Тони Михајловски, Сања Русевска, Марко Трајковиќ,  Александра Михајловска, Нина Максимова, Антонио Димитриевски, Дубравка Киселички, Владо Дојчиноски, Жарко Јовановиќ, Мирослав Петковиќ и Љупчо Хаџи Стојанов.

Претставата "Бегалка"  во Куманово се изведува по 30 години, а поради големата заинтересираност таа повторно ќе биде прикажана во петок.