Зачленете се во нашиот клуб на читатели и најновите текстови ќе ги добивате на вашата мејл адреса
Едни асфалтираат други уништуваат, вака најкратко може да се опише појавата која многу често е присутна на кумановските улици.
Само што ќе се асфалтира некоја улица за кратко време ќе се раскопа, заради поставување на електрична или цевководна инсталација.
Последен пример е улицата „Љупчо Арсов“, на која се поставува гасификациона мрежа.
Споменатата улица се наоѓа во близина на Гимназијата „Гоце Делчев“ и беше асфалтирана лани со проект на ЕУ за рехабилитација на канализационата мрежа. Жителите едвај дочекаа асфалт, а само по една година тој е уништен. По завршување на работата улицата ќе се поправи, но ќе остане со крпеници и нерамнини, по кои граѓаните ќе кршат нозе и автомобили.
- Да се водеше сметка за оваа работа Куманово до сега ќе имаше барем уште три булевари, а ќе се асфалтираше и писта на аеродромот Аџитепе, - велат кумановци.
Како се одвиваат работите на терен, се чини дека Општината и јавните претпријатија воопшто немаат координација и заедничко планирање на годишните активности. Ако се знае дека до пред 6 месеци половина Куманово беше раскопано поради поставување на канализација, а за реализација на проктот се чекаше најмалу 4 години, зошто тогаш не е направен план за комплетната подземна инсталација, меѓу кои и на гасификационата мрежа, кога 10 години се зборува дека таа е приоритет број еден на Општината.
- Толку ли е тешко работите да се предвидат и да се завршат на време без последици по градската инфраструктура? - прашуваат граѓаните.
Вака, со непланска градба само се тапка во место и парите на граѓаните одат во неповрат. Куманово останува со голем број на нерешени инфраструктурни проблеми и не асфалтирани улици, а тие што виделе асфалт се дупка до дупка од крпеници. Многу поалармантна е состојбата во приградските населби, бидејќи таму поретко се асфалтира, а постојано се вршат приклучоци во новиизградените куќи.
Новата локална власт под итно мора да најде решение за овој проблем и да го заштити јавниот имот, да го казни самоволието на одредени граѓани, приватни фирми или јавни претпријатија, доколку не ги почитуваат новите правила.