Зачленете се во нашиот клуб на читатели и најновите текстови ќе ги добивате на вашата мејл адреса
Вечерва во 19,30 часот во Изложбениот салон на Центарот за култура “ Трајко Прокопиев “ ќе биде отворена изложба на карикатури на Ѓорѓи Цветковски - Арап, насловена како “Батко Ѓорѓија и еротиката“.
Цветковски е роден во Куманово, а со сликарство се занимава од 1971 година. Во јавноста е познат како автор, кој своето ликовно творештво го изразува со веќе препознатлив ракопис во повеќе ликовни техники. Досега реализирал преку 40 самостојни изложби на кои се презентирал во техниките: кован бакар и масло на платно. Во последниве неколку години изработува икони и мозаици за потребите на црковните и манастирските храмови. Се занимава и со изработка на скулптури во дрво и камен. Учесник е на повеќе меѓународни ликовни колонии, како и на “Меѓународниот фестивал на афоризми и карикатури - Струмица 2009“ од каде и потекна идејата за самостојно претставување, за прв пат пред ликовната јавност во жанрот еротска карикатура.
Карактеристика на изложбата е карикатуралниот третманот на разни теми од кумановското секојдневие во кои главен лик е кумановскиот Батко Ѓорѓија даден во една фалусоидно-антропоморфна форма.
Изложбата ќе биде поставена до 18.03.2010 година.