Зачленете се во нашиот клуб на читатели и најновите текстови ќе ги добивате на вашата мејл адреса
Во Изложбениот салон на Центарот за култура “Трајко Прокопиев“ - Куманово, утре во 19.30 часот, ќе биде отворена изложба на слики на ликовните автори Наташа Радосављевиќ – Нара од Србија и Мирослав Трендафиловски – Мики од Македонија.
Изложбата содржи слики и цртежи и е со наслов “Лет и пев“. Идејата на самото претставување на овие автори е презентирање на нивната актуелна ликовна продукција надополнета со литературното творештво на Наташа Радосављевиќ – Нара за коешто ќе говори м-р Љупка Стојменова.
Наташа Радосављевиќ – Нара е родена во Јагодина, а живее и работи во Белград. Завршила колеџ за ликовна и применета уметност во Белград. Покрај творењето во областа на ликовната уметност се занимава и со пишување на поезија. Има учествувано на повеќе групни ликовни изложби, проекти и ликовни колонии како и дваесетина самостојни изложби. За својата работа има добиено повеќе награди и признанија. Член е на повеќе ликовни асоцијации. Има објавено три книги и членува во Здружението на српски писатели. За своето творештво ќе каже дека е испреплетена сликарско-поетска содржина, претставена со нејзиниот специфичен авторски сензибилитет нудејќи и на публиката едно свое видување на светот.
Мирослав Трендафиловвски – Мики е роден во Куманово кадешто живее и работи како самостоен уметник. Има учествувано на повеќе групни ликовни изложби, проекти и ликовни колонии како и 25 самостојни изложби во земјата и странство. Неговиот специфичен ликовен израз граден на повеќе децениско искуство говори за неговиот зрел сликарски пристап, творечка инвенција и авторски идентитет.
Изложбата во Куманово ќе биде поставена до 04. април годинава.