Изложба „Византиски и поствизантиски сакрални споменици во Кумановско“

На изложбата ќе бидат прикажани сакралните споменици, односно сите цркви и манастири од византискиот и османлискиот (Поствизантиски) период, како и две џамии од османлискиот период.

„Главни претставници од Византискиот период се црквите „Св. Ѓорѓи“ во Старо Нагоричане од 11 и 14 век и манастирот „Матејче“, изграден во 14 век. Од османлискиот период ќе бидат прикажани повеќе селски цркви, од околината на Куманово, со видливи  исламски влијанија од 16 и 17 век. Главни  претставници од  овој период се: „Св. Ѓорѓи Победоносец“  и „Св. Петка“ во Младо Нагоричанe, манастирот „Карпино“ (1592)  и „Двојна црква“ во Сув Орах, „Св. Никола“ во Стрезовце, „Св. Ѓорѓи“ во Жегљане, „Св. Никола“ во Бељаковце, „Св. Параскева“ во Мургс, „Св. Дух“ во Добрача, „Св.Петка“ во Пезово и „Св.Спас“ во Довезенце, - изјави Крстиќ, советник историчар на уметност во НУ Музеј-Куманово, која истражувањата ги врши од 2004 година.

Изложбата ќе биде надополнета и со цртежи од значајни композиции од фреско-сликарството, како и од рабеските на џамиите и фреско-копии од Старонагоричкиот храм, позајмени од Музејот на Република Северна Македонија.

„За џамиите „Татар Синан бег“ во Куманово„ и  „Коџа Мехмед Беј“ во Табановце (од 16 век), како и за 15 други црковни градби, ќе бидат изработени колор фотографии, од област на архитектура и фрескосликарство. Фотографиите ќе бидат прикажани на фото постери, со димензии 70x100 цм“, - додава авторката.

Изложбата е проект на општината Куманово, од програмата 500 години Куманово, а ќе биде финансирана од градоначалникот и Советот на Општина Куманово.