Наместо да се приватизираат јавните претпријатија да се професионализираат и департизираат, бара Левица

 Од партијата сметаат дека давањето под концесија, докапитализација или пак приватизација на јавните претпријатија и јавните служби, коишто треба да ги менаџира општината се коси со самата смисла на нивното постоење - јавните служби функционираат врз основа на принципот на јавен интерес, а никако на профитабилност.

- Приватните инвеститори имаат единствена цел, а тоа е остварување на профит, што значи дека квалитетот на услугите, колку и да е лош сега, или ќе биде уште послаб или цената која ќе ја плаќаат кумановци ќе биде многу повисока. Штетноста од приватизацијата т.е. докапитализацијата е уште поголема во однос на ЈП Куманово-гас, кое со народните пари ги изгради примарната и голем дел од секундарната, дистрибутивна мрежа, и кое претпријатие по природа на нештата е монопол. Најавената негова „докапитализација“ ќе претставува всушност давање на подарок на приватниот инвеститор, кој со мала инвестиција ќе го „собере кајмакот“ од веќе завршената инвестиција која ја платиле граѓаните на Куманово, - се вели во соопштението на Левица.

 Според Левица, со одлуката за јавно-приватно партнерство само се признава и потврдува неспособноста за управување, па излезот од наталожените проблеми се гледа во приватизации, докапитализации и издавање на концесии.

Со ова, всушност, се обидуваат да избегаат од одговорноста за сопствената неспособност а цехот повторно да го платат граѓаните на Куманово. Иако нема пари за вршење на јавните служби, сепак општината од година во година има нови вработувања, па такав 2012 година -24, во 2013 година 5, 2015 година -22, во 2016 година -9 и во 2017 година-22 само привремени вработувања, дополнително оптоварувајќи ги кумановци, кои и онака веќе ја плаќаат партиската армија во Општината, - стои во соопштението на Левица, испратено до медиумите.