Зачленете се во нашиот клуб на читатели и најновите текстови ќе ги добивате на вашата мејл адреса
Со повеќе активности денеска во Куманово беше одбележана 75 годишнината од загинувањето на народниот херој Христијан Тодоровски Карпош.
Здружението на воени и полициски ветерани синоќа оддржа свечена академија, а денеска Сојузот на борците организираше посета на Спомен куќата на Карпош.
Ние кумановци сме горди и среќни што Карпош беше наш сограѓанин и тажни што не ја дочека слободата и создавањето на државата за која пред олтарот на слободата го положи својот млад живот. Во борбениот пат Карпош се калеше и стекнуваше борбени искуства, покажа храброст, одважност, другарство и секогаш бил во првите редови во борбените акции, - рече во своето обраќање претседателот на Здружението на воени и полициски ветерани, Драган Стојмановски.
На прославата беше прикажан филм за Карпош, а беа доделени благодарници на заслужни граѓани и фирми кои помогнале работата на здружението.
За историската улога на Карпош во создавањето на македонската држава и неговата храброст во името на Здружение на борците и поддржувачите денеска зборуваше Драган Гачиќ.
Христијан Тодоровски Карпош, со својата храброст, умешност, раководење, командување, несомнено спаѓа во редот на легендарните команданти на Народноослободителната и антифашистичка војна на Македонија, -рече во обраќањето пред присутните, Гачиќ.
Христијан Тодоровски Карпош, роден 1921 година во Куманово, а бил убиен од страна на бугарскиот окупатор на 7 февруари 1944 година за време на нападот на бугарското воено и полициско упориште во селото Билјача, Прешевско.