Зачленете се во нашиот клуб на читатели и најновите текстови ќе ги добивате на вашата мејл адреса
Надлежните најавуваат дека оштетувањата на собраќајниците, тротоарите и пешачките патеки во градот и приградските населби, повеќе нема да се толерираат.
Општината ќе преземе ригорозни мерки и ќе ги казнува граѓаните што создаваат диви прекопи по јавните површини. Надлежните најавуваат дека секојдневните оштетувања на собраќајниците, тротоарите и пешачките патеки во градот и приградските населби ја поминале секоја мерка, поради што ќе мора да се застане на патот на таквото однесување на поединци и фирми во градот. Законот предвидува за сите интервенции да се побара одобрување од Секторот за урбанизам, а доколку не се почитува процедурата сторителите ќе се казнат.
Сведоци сме дека има голем број на прекопи што граѓаните ги вршат за време на викендите, празниците или вечерните часови и потоа не ги враќаат во првобитната положба.Тоа е казниво со закон и затоа апелирам до граѓаните, но и јавните претпријатија да ги следат процедурите и по нив да постапуваме, за да можеме да го зачуваме уредениот простор во градот -вели Оливер Спасовски, секретар во Општината.
Граѓаните најчесто прекопите ги прават заради приклучоци за вода, канализација, струја и друго, без одобрение од никого.Најмногу се оштетуваат улиците во новите населби, но често тоа се прави и во централното градско подрачје. Таков пример имаме и на пешачката зона спроти „Статер банка„. Сопствениците на еден од угостителски објект уште минатото лето го ископа плочникот и ги извади бекатон плочките за да постават трафостаница. Потоа плочките исчезнаа, а на местото остана дупка полна со вода. Сопствениците на околните дуќани кажуваат дека многу често граѓаните паѓаат во прекопот, бидејќи не очекуваат дека плочникот е прекинат.
Од општината велат дека и инспекциските служби ќе бидат поревносни за да се искорени лошата навика на уништување на она што е јавно добро.
Прекршителите во иднина не само што најригорозно ќе бидат казнувани, туку ќе мора да ја надоместат и направената штета.