Отворена градинката „Детелинка“ во Куманово

Градинката се наоѓа во приземјето на некогашниот Пионерски дом, на површина од 350 метри квадратни. Има три занимални со една јаслена и две градински групи, како и гардеробри, кујна и тоалети. Потрошени се 5 милиони денари обезбедени од Министерството за труд и социјална политика.

На оворањето на градинката присуствуваше министерката Мила Царовска, која рече дека заложба на Владата е за 50 проценти да се зголеми сместувањето на децата во градинките.

 „Нашата цел како Влада е за 50 отсто да го зголемите опфатот на децата во предучилишно образование, и затоа интензивно отвораме нови објекти. Во 2019 година со Светска банка и со Владата стартуваме со една програма за унапредување на квалитетот на претшколското образование, затоа што програмата треба да е прилагодена на новите општествени текови“,- изјави министерката Царовска.

Во наредниот период Општина Куманово треба да изготви и проект за целосна реконструкција на Пионерскиот дом, по што Владата ќе обезбеди средства за негова реализација и со тоа целиот објект ќе биде пренаменет за предшколска установа.

Градоначалникот на Куманово, Максим Димитриевски,  истакна дека градинката е исклучително значајна за децата од овој дел градот, а особено што запуштениот Дома на пионери доби нова намена.

“Се заблагодарувам на сите кои дадоа придонесоа овој проект да се трансформира во една успешна приказна и воедно сакам да ја истакнам нашата желба и заложба за создавање на дополнителни добри дела за кои верувам дека ќе добиеме поддршка од централната власт, од Владата и ресорното министерство“- изјави Димитриевски.

Директорката Марина Алексовска се заблагодари на Министерството за труд и социјална политика за подршката при реконструкција на објектот, како и за набавка на опремата и дидактички помагала за децата, при што нагласи дека установата со свои средства инвестирала во поставување на дел од оградата, бекатон и пристапните патеки.

„Во наредниот период ќе се реконструра Пионерскиот дом и целиот простор ќе се пренамени за детска градинка која е неопходна за овој дел од градот. Сега за првпат во центарот на градот имаме јаслена група. Единствена градинка беше „Кокиче„ каде немаше јасли, а имавме голем притисок и потреба од граѓаните на Куманово“, - рече директорката Алексовска.

      Реконструкцијата на дел од Пионерскиот дом започна во август минатата година, а беше планирано да заврши до средината на септември, но поради проблеми на кровната конструкција и гасификација на објектот отварањето задоцни 8 месеци.

Во Куманово во состав на градинката „Ангел Шајче“ работат 7 објекти и два центри за ран детски развој во кој се сместени над 1.800 деца. Но потребите на градот се многу поголеми и со години родителите имаат сериозни проблеми со сместување на децата. На листата на чекање има повеќе од 700 деца.