Зачленете се во нашиот клуб на читатели и најновите текстови ќе ги добивате на вашата мејл адреса
Кумановскиот писател Петар Андоновски од 11 до 15 септември, гостува на Меѓународниот литературен фестивал „Виленица“ во Словенија, кој го организира асоцијацијата на писатели на Словенија во соработка со Центарот за култура „Виленица“.
Тема на годинешното 34. издание е „Его и фабула“, а фестивалот ќе се фокусира на жанрот автобиографија.
„Ќе учествувам на тркалезна маса со останатите учесници и имам читање во Љубљана и во Штањељ“. Инаку, ќе читам делови од мојот роман „Телото во кое треба да се живее“,- вели писателот Андоновски.
Во романот станува збор за невозможноста, да си го сакаме телото поради насобраните стравови и потиснати желби. Ова е роман кој го отвора филозофското прашање: зошто за човекот неговото тело е кафез, а не храм во кој треба да го негува неговиот дух? Андоновски, со „прераскажувањето“ на приказната за адвокатката и осуденикот успева да допре до најдлабоките прашања за човековата природа и општествената зарообеност.
Меѓународниот литературен фестивал „Виленица“ е основан во 1986 година, а се одржува на повеќе локации во Словенија: Љубљана, Кочевје, Копер, Сежана, Штањел, Храстник и Копер, но и во пештерата Виленица.
Петар Андоновски (32) од Куманово е автор на книгите: „Ментален простор“ (поезија, 2008), „Очи со боја на чевли“ (роман, 2013), „Телото во кое треба да се живее“ (роман, 2015), за кој ја доби наградата Роман на годината, како и неговиот последен роман „Страв од варвари“ (роман, 2018).
Зачленете се во нашиот клуб на читатели и најновите текстови ќе ги добивате на вашата мејл адреса
