Зачленете се во нашиот клуб на читатели и најновите текстови ќе ги добивате на вашата мејл адреса
Ракометарите на Вардар направија уште едно изненадување и по втор пат станаа европски прваци во ракомет.
Во финалниот натпревар тие беа подобри од Веспрем со резултат 27-24(16-11). По вчерашниот кам-бек против Барселона, Вардар најде сили да одигра феноменален меч против Веспрем.
Вардарци одиграа перфектно прво полувреме и му покажаа на противникот дека нема лесно да се предадат, по што заминаа на полувреме со 5 гола предност. Цврстата одбрана и луцидниот напад, го матираа Веспрем кој беше во игра исклучиво на индивидуален квалитет.
По паузата следуваше криза во македонскиот состав. Ненадиќ во нападот и Штербик на голот внесоа сигурност во тимот на Веспрем кој ја за кратко време ја смали разликата на еден гол и ја врати неизвесноста. Одбраните на Милосављев, головите на Кристопанс и Чупиќ го трасираа патот на Вардар кон европската титула, а пред се големото срце на целиот тим предводен од тренерот Парондо, кој маестрално ја постави играта за втора титула на Вардар во најквалитетното клупско ракометно натпреварување.
Пикерот Мораеш беше најефикасен во Вардаровиот тим со шест гола и вистинско изненадување на мечот, погодувајки токму кога беше најпотребно. Кај Веспрем шест гола постигна Мае.