Зачленете се во нашиот клуб на читатели и најновите текстови ќе ги добивате на вашата мејл адреса
Не само јас како градоначалник туку сите треба да се срамиме од состојбата во која се наоѓа Спомен костурницата на паднатите борци од НОБ, изјави градоначалникот Максим Димитриевски по обвинувањата на Левица дека споменикот се наоѓа во очајна состојба.
Првиот човек на градот ги обвини несовесните граѓаните дека со своето недолично и вандалско однесување секојдневно го оштетуваат споменикот, а државата со години не преземала ништо за негова заштита иако Општината во рамките на своите надлежности го одржува зеленилото.
„Локалната самоуправа презеде одредени активности заедно со јавните претпријатија делумно да ја средиме и уредиме зелената површина на Спомен костурницата, и да ја исчистиме. Но, за жал останатиот дел е во надлежност на Министерството за култура, а самите знаете дека споменикот е осквернавен повеќепати, испишани се погрдни графити, уништени се дел од криптите и спомен плочите. Побарав од Министерството за култура и од министерот да излезе на лице место заедно со претставници на Конзерваторскиот центар. Најавена е посета за следната недела за да се реши проблемот со Спомен костурницата и со останатите спомен обележја во Куманово од НОБ, кои последните 12 години беа оставена на забот на времето. Локалната самоуправа нема одговорност, но заедно со Владата ќе направиме се Спомен костурницата да ја доведеме во ред, за да не се срамиме од состојбата во која се наоѓа“, - изјави Димитриевски.
Градоначалникот најави дека и во иднина 9 Мај ќе се одбележува во централното градско подрчаје пред Споменикот жена борец, за да граѓаните се вклучат помасовно во чествување на празникот.