Зачленете се во нашиот клуб на читатели и најновите текстови ќе ги добивате на вашата мејл адреса
Советот на Општина Куманово нема да одржи вонредна седница по барање на ВМРО-ДПМНЕ, за да расправа за загадувањето на водухот, туку во петок ќе организира трибина на која експерти ќе дадат насоки како да се изнајде решение за проблемот.
Ние сме секогаш тука да разговараме и за таа цел и со нашите колеги од опозицијата деновиве ќе закажеме трибина на која заедно со граѓаните и надлежните експерти ќе поразговараме сериозно каква е всушност состојбата, кои се локалните и државните мерки, па и практиките во светот, како да ја надминеме состојбата со аерозагадувањето. Тоа не е проблем од вчера ниту од лани, туку со децении наназад, а не се решава ни преку ноќ. Така да сметам дека нема потреба од вонредна седница. На некоја од редовните седници ќе разговараме и за ова прашање, - изјави претседателката на Советот Атина Мургашанска.
Таа додава дека загадувањето е глобален проблем за чие решавање мора сите да се вложиме, локална самоуправа како одговорна власт, но и секој граѓанин, при користење на еколошки горива, еколошки начин на загревање и менување на навиките. Затоа смета дека барањето за вонредна седница е обид да се дефокусира јавноста од актуелниот проблем, бекството на нивниот поранешен лидер Никола Груевски, да се сврти вниманието од актуелните судски постапки за натрупаните криминали и непотребно да се внесува доза на загриженост кај граѓаните.
Советничката група на коалицијата „За подобра Македонија“ предводена од ВМРО-ДПМНЕ, достави иницијатива за свикување на вонредна седница на Советот на општина Куманово, на која ќе преземат мерки за заштита од екстремното загадување во градот.