500x100-1
21. 05. 2019 16:48

Теодора Спасовска победник на првата Ораторска вечер во Куманово

Теодора Спасовска победник на првата Ораторска вечер во Куманово

Теодора Спасовска, ученичка во трета година во гимназијата „Гоце Делчев“, ја освои првата награда на првата Ораторска вечер што ја организираше Клубот на оратори на Правниот факултет од Скопје, а синоќа се одржа во Центарот за култура „Трајко Прокопиев“ во Куманово.

Теодора вели дека за неа било голем предизвик и храброст да застане на говорница, a откако се победила самата себеси пресреќна е што публиката ја сослушала, а жирито ја наградило за нејзината порака до младите и повозрасните.

„Поенатата на мојот говор беше како младата интелегенција овде не е доволно ценета, па тоа е една од причините што ја напушта мојата чудесна земја и се иселува некаде, каде што трудот е многу поценет отколку што е овде во моментот. Како млада индивидуа тоа го гледам на тој начин и сметам дека и сите останати кои се мои врсници и малку поголеми сметаат на истото“, - вели Спасовска.

Таа започнала со пишување од минатата година, тоа и е пасија, но не е нешто со што би се занимавала професионално.

„Имам други зацртани цели, ова го сметам како моја уметничка страна со која се занимавам во слободно време и навистина ме исполнува“, - додава Спасовска.

Директорот на Центарот за култура Сашо Тодоровски, е пријатно изненаден од интересот на младите за учеството на првата Ораторска вечер во Куманово.  

„Имаше пријавено преку 50 учесници, меѓутоа комисијата направи избор од 12 кандидати и тие вчера се претставија пред кумановската публика, со одлични говори. Очекумане манифестацијата да стане традиција, да се одржува секоја година во мај месец“ ,- изјави Тодоровски.

 На Ораторската вечер учествуваа учениците од првите три години од средните училишта во градот.

Теодора Спасовска победник на првата Ораторска вечер во Куманово