21. 02. 2018 14:32

Три катни гаражи најави градоначалникот Димитриевски

Три катни гаражи најави градоначалникот Димитриевски

Катни монтажни гаражи на паркинг просторот кај КИБ банка, трговскиот центар СУ-МА и на локалитетот Серава, најави градоначалникот Максим Димитриевски на денешниот отчет пред граѓаните.

„Куманово е град проектиран за 8 до 10 илјади возила, а во моментот имаме 27.000 возила регистрирани во нашата општина, ако не ги сметаме оние што транзитираат низ Куманово од соседните општини. Таа бројка на дневна основа надминува над 30.000 возила што значи дека Куманово мора да создаде нова сообраќајна инфраструктура. Во моментот согласно финасиските можности не можат да се прошират булеварите, бидејќи ќе биде потребна експропријација. Затоа ќе градиме катни гаражи на три локации, зад КИБ банка кај т.н. Берза, зад трговскиот центар СУ-МА и зад стамбено-деловниот комплекс Серава, ќе се постави урбана опрема која ќе обезбеди дополнителни паркинг места“, - изјави градоначалникот Димитриевски.

На денешниот отчет за сработеното во првите 100 дена од стапувањето на функцијата, градоначалникот наброја дваесетина проекти главно од патната инфраструктура, животната средина, поставување на урбана опрема, како и тековни активности средби со над 1000 граѓани. Димитриевски најави и нови проекти за гасификација, кружни текови, катни гаражи, уредување на улицата 11 Октомври и влезот на градот, градинка, училишна спортска сала и друго.