Владата препорача и Куманово да се вклучи за субвенции за инвертер-клими

„Владата денеска донесе одлука да ѝ препорача на работната група за субвенции на инвертер клими да ја вклучи Општина Куманово на листата градови за примена на оваа мерка, или да понуди решение за поддршка на граѓаните и на локалните институции за приклучување на системот за дистрибуција на гас во општината. Во таа насока е и препораката за наоѓање итно решение за замена на постоечкиот начин на загревање на Општата болница Куманово со можностите за греење на гас, имајќи го предвид планираното воведување на гасификација во болницата при изградбата на новиот ургентен – хирушки центар“, соопшти прес-службата на Владата.

Владата ќе го субвенционира целиот износ до 60.000 денари за купување на нова клима инвертер за замена на печките на цврсто гориво.

Субвенциите ќе се покријат од буџетот на ЕСМ, аспоред планот за оваа мерка ќе се потрошат од 3 до 4 милиони евра.

На вчерашното садување дрвца и градоначалникот Максим Димитриевски побара оваа мерка да биде достапна и за граѓаните на Куманово, а не само за Скопје, Тетово и Битола.

„Сметам дека Куманово е ставено во подредена состојба и ресорното министерство треба да ја промени оваа одлука и да дозволи и граѓаните на Куманово да го користат тој бенифит“, - изјави Димитриевски.

Потпретседателот на Владата и министер за внатрешни работи Оливер Спасовски, побара Владата да го субвенционира приклучувањето на гас на граѓаните во Општина Куманово.

„Денеска предложив, а Владата донесе заклучок да се разгледа можноста во иднина да ги субвенционира новите пруклучоци на граѓаните на природен гас во Општина Куманово, а ќе ја гасифицираме и Kумановската болница“ – објави министерот Оливер Спасовски.

Општина Куманово преку ЈП „Куманово-гас“ субвенционира 150 евра од вкупно 800 евра колку изнесува приклучок на гас за домаќинствата , но интересот е слаб, бидејќи граѓаните не се во состојба да плата остатокот и да ги покријат сите трошоци околу инсталирањето на системот за греење.