Третото доба од Крива Паланка активно се вклучува во медиумската писменост

Во рамки на оваа иницијатива беше спроведена анкета за мерење на медиумската писменост и довербата во медиумите кај 55 лица постари од 60 години. Резултатите ја откриваат актуелната слика за медиумските навики и дигиталната поврзаност на лицата од третото доба.

„Резултатите покажуваат дека телевизијата и понатаму останува најчесто користен медиум кај постарите лица и тоа со учество од 54%, но и интернетот (34%),се истакнува како значаен канал за информирање. Најголем дел од испитаниците имаат секојдневен пристап до интернет, а мобилниот телефон е како примарен уред за добивање информации, кој активно го користат 76% од испитаниците. Ова ги демантира стереотипите дека постарите лица се пасивни корисници на дигитални технологии и ја потенцира потребата од медиумска едукација“, вели Жаклина Цветковска од РЦС Спектар.

Голем дел од испитаниците (89%) изјавиле дека ги разбираат медиумските содржини, додека скоро сите понекогаш изразиле сомнеж во точноста на информациите. Иако 22% признаваат дека некогаш донеле одлука врз основа на неточна информација, мнозинството се свесни за ризиците од дезинформации и се подготвени да преземат чекори за нивно препознавање.

Доверба и препознавање на лажни вести

Анкетата покажува дека постарите лица и понатаму имаат најголема доверба во традиционалните медиуми, пред се во националните медиуми. Во однос на препознавање лажни вести, 73% сметаат дека можат да ги идентификуваат, што е охрабрувачки сигнал за нивната медиумска свест. Околу половина од испитаниците, пак, при сомнителни информации ги проверуваат изворите, што покажува одговорен пристап кон медиумската содржина.

Силна подготвеност за учење беше забележана кај 91% од испитаниците, кои главно преферираат традиционален пристап преку локални работилници. Нивниот мотив е заштита од манипулации, измами и донесување информирани одлуки во секојдневниот живот.

Подготвени за критичко размислување

Истражувањето покажува дека постарите лица во Крива Паланка не се само пасивни приматели на информации. Тие активно ги користат и традиционалните и современите медиуми, свесни се за ризиците од дезинформации и покажуваат интерес за едукација и критичко размислување. Локално базирани, интерактивни активности се клучни за нивното вклучување и унапредување на медиумската писменост.

Покрај анализата, во рамки на акцијата беше одржана и едукативна работилница за медиумска писменост на лицата од третото доба со медиумскиот експерт Огнен Јанески, кој на практичен и пристапен начин ги водеше учесниците низ темите со примери од медиумската информативна сцена.

Учесниците на работилницата имаа можност да се запознаат со основите на критичко читање на вести, препознавање на лажни информации и безбедно користење на дигиталните платформи.

Работилницата ја поттикна дискусијата и размислувањето за важноста на медиумската писменост во современиот информативен свет, а учесниците стекнаа нови знаења и практични совети за критичко следење на медиумите. Нивното активно учество јасно ја покажува желбата на постарите лица да бидат информирани, критички и дигитално компетентни.

Автор: Сузана Николиќ

Прилогот е подготвен со поддршка од Европската Унија, во рамки на проектот „Здружени за активно граѓанство“. Содржината е единствена одговорност на авторот, и на никаков начин не може да се смета дека ги одразува гледиштата на Европската Унија.