Зачленете се во нашиот клуб на читатели и најновите текстови ќе ги добивате на вашата мејл адреса
Изминатите неколку дена, делови од Куманово повторно останаа без вода за пиење. Семејствата во повисоките зони и централното градско подрачје вода имаат само ноќе, додека во текот на денот притисокот е слаб или водата воопшто ја нема.
Граѓаните се револтирани што за новогодишните празниците останаа без доволни количини вода и бараат од надлежните претпријатија веќе еднаш да го решат проблемот со водоснабдувањето.
Проблемот е во намалениот дотур на вода од Водостпанското претпријатие „Кумановско - Липковско поле“. Наместо 220л/с, колку што е вообичаено за нормално снабдување на градот, деновиве во Филтер станицата се испорачуваат само 150л/с вода. Вината е кај нив, но не знам која е причината. Дали имаат дефект на цевководот или се затворени вентилите, но не сакам да верувам дека се работи за политичка игра - вели градоначалникот Зоран Дамјановски.
Од Водостопанското претпријатие тврдат дека тие не се виновни за проблемот со водоснабдувањето и кажуваат дека испорачуваат доволни количини на вода на ЈП „Водовод“.
Кумановско-липковско поле испорачува нормални количини на вода, а што се случува со системот на ЈП „Водовод“ ние не знаеме. Ингиренциите на водот со кој се снабдува градот до самиот вентил и вентилот се во рацете на Водовод и ние немаме технички услови да ја затвориме водата - вели Дејан Божиновски, директор на Водостопанското претпријатие Кумановско - липковско поле.
Од ЈП „Водовод“ велат дека во функција се ставени и пумпите во селата Бедиње и Проевце, од кои се испорачуваат дополнителни 100 л/с вода, но поради зголемената потрошувачка на вода не можат да се задоволат потребите на граѓаните.
И додека јавните претпријатија си ја префрлаат вината, акумулациите Липково и Глажања преливаат од вода граѓаните на куманово се жедни среде зима.