Зачленете се во нашиот клуб на читатели и најновите текстови ќе ги добивате на вашата мејл адреса
Шест лица завршиле во болница по масовна тепачка помеѓу две семејства од соседни маали во липковското село Лојане.
Двајца од повредените поради сериозноста на раните, се пренесени во Ургентниот центар во Скопје, а останатите се задржани на лекување во кумановската болница.
Селската пресметка се случила во саботата околу 14 часот и во неа учествувале: Џeљадин Н.(49), Аријан Н.(20) и Азми Н.(16) од една страна и Агим Б.(39) и Ибраим Б.(23) од друга страна, сите од селото Лојане. Неа ја предизвикале Аријан и Агим, кои прво се скарале за банална работа, а потоа почнале и физички да се пресметуваат. Тогаш на помош им притрчале и во тепачката се вклучиле и останатите од семејствата. Тие се удирале со стапови и си нанеле сериозни повреди. Најлошо поминале Агим и Џељадин кои со повреди на главите се оперирани во Скопје.
Увид на лице место извршила увидна екипа од СВР-Куманово, при што се пронајдени и подигнати 5 дрвени стапа, 1 рачен часовник и траги од крв, кои ќе се достават на вештачење. СВР-Куманово презема мерки за расчистување на настанот и утврдување на причините за тепачката.Извори од болницата велат дека тепачката била толку масовна што кај нив биле донесени и повеќе лица што се здобиле со полесни повреди и по укажаната лекарска помош биле пуштани дома. Повредените во болницата останале со полициска придружба.