ЕВН влезе во Слупчане да ја модернизира мрежата, жителите ќе плаќаат струја колку што ќе потрошат, стои во договорот

Претставник на локалното население и советник во Советот на Општина Липково, Иљаса Абази, вели дека е постигнат договор кој е во согласност со законот и на обострано задоволство на двете страни. Се надева дека тој ќе се почитува и повеќе ќе нема вакви недоразбирање. 

„Според договорот секој ќе плаќа колку што ќе потроши и нема да има привилегирани. Жителите кои што се социјални случаи и имаат заостанат долг ќе го плаќаат на рати, како што е случај и во другите места.  Мислам дека ЕВН  ќе нема проблеми да ги постави броилата и бандерите за новата мрежа, по што очекуваме да се решат и проблемите со честите дефекти“, кажа Абази.

Од ЕВН потврдија дека екипите на Електродистрибуција денеска ќе започнат со работа во селото Слупчане и дека законите кои важат за сите корисници во државата, ќе продолжат да важат и понатаму во селото.

Предлогот да се плаќа по 3.000 денари, Абази вели дека бил повеќе бил како препукување, бидејќи со некои раководители на ЕВН која е приватна компанија, на стартот имале недоразбирања. 

Жителите на Слупчане го блокираа влезот на селото на почетокот на минатиот месец, откако почнало поставувањето на електрични броила. Тогаш ЕВН обвини  дека во Слупчане, кражбите на електричната енергија се околу 80 отсто, а наплатата е само 20 проценти.
Поради тоа жителите доставија барања од ЕВН, како простување на долговите, нови приклучоци за 6.000 денари, потоа сметките да не можат да бидат повисоки од 3.000 денари без разлика на потрошената струја.

По неколку неделните преговори, на кои гаранција беа политичарите, се најде решение на проблемот.