Дезинформација е дека 90 проценти од починатите се вакцинирани

Фејсбук објава без докази и извори од релевантни институции, шири невистини дека 90 проценти од починатите овој месец се вакцинирани, додека анализите на Министерството за здравство покажуваат дека 79 отсто од починатите и 69 отсто  од новозаразените во изминатите  4 месеци се токму невакцинирани лица

Фото: pixabay.com

Рецензираме пост на Фејсбук во којшто се  изнесуваат дезинформации дека најголем број од починатите овој месец се лица кои примиле вакцина, наспроти статистиките кои покажуваат сосема спротивни наоди. Деновиве Министерството за здравство ги објави најновите податоци за новозаразените и починати од ковид-19 за последните 4 месеци, но и истражување за целиот период од почетокот на пандемијата, во кои јасно се укажува дека на најголем „удар“ од вирусот се токму невакцинираните.

Знаете ли дека 90 проценти од починатите овој месец примиле вакцина?, стои во наведениата Фејсбук објава.

Ваквото тврдење е целосно невистинито и непотрепено со докази, со намера да ги поттикне антивакциналните ставови и да ги одврати граѓаните од имунизација, а сето тоа во период на појава на нов сој на коронавирусот, како што е омикрон за кој се вели дека е многу позаразен.

Вистинската слика во земјава е сосема спротивна на ова паушално тврдење, бидејќи според официјалните податоци во најновата анализа на Министерството за здравство, објавена на 3 декември 2021 година,  69 отсто од позитивните случаи се невакцинирани лица, а нивниот број меѓу починатите изнесува  79 отсто.

Анализата се однесува на периодот од 6 август заклучно со 2 декември годинава. За вакцинирани се сметаат лицата кои примиле две дози вакцина и поминале најмалку 14 дена од примање на втора доза.

Во период од 06.08 до 02.12.2021 на територијата на државата 60.772 граѓани се позитивни од тестирани на ковид-19. Од нив 31 отсто биле целосно вакцинирани, односно 19.025 лица. Голем е бројот на невакцинирани граѓани кои се заразиле со ковид -19. Според статистика за изминативе месеци, 41.747 граѓани, односно 69 отсто од позитивните на ковид-19 не биле вакцинирани. Смртноста кај невакцинираните е драстично поголема. Во анализираниот период, од вкупниот број починати со ковид-19, 79 отсто биле невакцинирани, а 21 отсто примиле вакцина. Според анализите, починатите имале повеќе комбинирани хронични заболувања, стои во соопштението на Министерството за здравство.

Здравствените власти, исто така, укажуваат на безбедноста на вакцините и апелираат граѓаните да се имунизираат за да се постигне колективен имунитет.

Ефикасноста на вакцините и спречувањето на тешки последици и смрт,  е потврдена и во истражувањето на Министерството за здравство, предводено од  д-р Харис Бабачиќ, магистер по епидемиологија и докторант-истражувач на Институтот Каролинска (Стокхолм, Шведска), во соработка со Жаклина Чагороска од Управата за електронско здравство при Министерството за здравство.

Во првичната сеопфатна анализа за ефективноста на вакцините во спречување хоспитализација и смрт кај македонската популација биле следени сите корисници на националниот електронски здравствен систем „Мој термин“ од денот на првата регистрирана вакцинација (15 јануари 2021) до 30 септември 2021 година. Вклучени се вкупно 1.886 124 граѓани, на возраст од 11 години и постари,  од кои 779 558 вакцинирани испитаници кои примиле барем една доза вакцина и 1.106 566 невакцинирани испитаници. Од популацијата 41.33 отсто биле вакцинирани со барем една доза, но повеќето (37.78 отсто) биле целосно вакцинирани со две дози. Најголем дел од испитаниците ја примиле вакцината BNT162b2 на производителот „Pfizer/BioNTech“ и вакцината „CoronaVac“ на производителот „Sinovac“.

Анализата покажува дека вкупно 30.136 лица биле хоспитализирани  од почетокот на епидемијата во Северна Македонија (26.02.2020) до 30.09.2021, од кои 6.542 починале (21.708 % од хоспитализираните). Просечната возраст на хоспитализираните изнесува 61 година, а 56.5 отсто од нив биле мажи. Од хоспитализација до смрт поминувале во просек 14.8 дена, а половина од испитаниците умреле во рок од осум дена по хоспитализација. Сите тие кои биле хоспитализирани пред да бидат вакцинирани со прва доза, биле класифицирани како невакцинирани случаи, се наведува во анализата.

И од почетокот на годината, состојбата не е променета, односно од вкупно 16.691 хоспитализации, дури 15.577 се регистрирани кај невакцинирани лица. Од вкупно 3.947 регистрирани смртни случаи во периодот 15.01.-30.09.2021, само 179 смртни случаи биле регистрирани кај целосно вакцинирани лица (0.0251 отсто), за разлика од невакцинираните чија бројка изнесува 3.642 смртни случаи  (0.329 отсто).

Постарата возраст и машкиот пол, како што се наведува во истражувањето, значително ја намалуваат ефективноста на вакцините. Граѓаните на возраст од 65 и повеќе години имале околу 76 отсто поголем ризик да бидат хоспитализирани од оние под 65 години, а мажите  околу 23 отсто поголем ризик од хоспитализација од жените. Според анализата, сите вакцини покажале висока ефективност, над 91 отсто во спречување смрт од ковид-19.

И новите извештаи на ЦДЦ (овде, овде) потврдуваат дека невакцинираните во САД имаат 11 пати поголеми шанси да умрат од ковид-19, наспроти оние што се вакцинирани. Од април до јуни годинава невакцинираните  сочинувале 95 отсто од случаите на ковид-19, 93 отсто од хоспитализациите и 92 отсто од смртните случаи, а од јуни до јули статистиката е следна: 82 отсто од случаите, 86 отсто од хоспитализациите и 84 отсто од смртните случаи.

Податоцитe на страницата на Our World in Data за смртност со статус на вакцинација што ги објавува  ЦДЦ на неделно ниво, покажуваат дека на 2 октомври процентот кај невакцинираните е 7.29 во однос на целосно вакцинираните кој изнесува 0,55 отсто на 100.000 луѓе.

Според информациите на Канцеларијата за национална статистика на Англија (ONS),  за смртните случаи помеѓу 2 јануари и 24 септември 2021 година, пак, ризикот од смртта прилагодена на возраста од ковид-19 била 32 пати поголем кај невакцинираните, во однос на целосно вакцинирани поединци.

Имајќи ги во предвид сите посочени наоди од релевантни истражувања и анализи на официјални институции, оценуваме дека тврдењето изнесено во Фејсбук објавата што ја рецензираме е неточно и невистинито. Искуствата од имунизацијата и кај нас и во светот,  го покажуваат токму спротивното, невакцинираните се многу поизложени на опасност од хоспитализации и смрт во споредба со вакцинираните лица.

 

 

 

 

 

 

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар