Не е вистина дека не постои ковид, туку само ,,антиковид отровни лекарства”

Kовид-19 постои и е изолиран во лабораторија во официјална постапка. На 7 јануари 2020 година, Кина го изолира вирусот и го идентификуваше како коронавирус, а од 13 јануари ја сподели геномската секвенца со СЗО. СЗО има објавено и водич за детално користење на сите лекови кои се одобрени за третирање ковид-19, кој е редовно ажуриран. Сите лекови се подложни на клинички испитувања и не постојат никакви индиции дека се отровни

Фото: HFCM Communicatie/Wikipedia.org

Рецензираме пост објавен на социјалната мрежа Фејсбук во кој се изнесени дезинформации за пандемијата со ковид-19, како и за коронавирусот кој ја предизвикува болеста ковид-19. Во постот се тврди:

Не постои ковид вирус, постојат антиковид отровни лекарства.

Наспроти ова невистинито тврдење, коронавирусот постои и е изолиран во лабораторија во официјална постапка.

На 7 јануари 2020 година, Кина го изолирала вирусот и го идентификувала како коронавирус, а од 13 јануари ја споделила геномската секвенца со Светската здравствена организација. На веб-страницата на Американската национална библиотека за медицина беше објавен целосниот геном од изолираниот вирус, земен во раните фази, како и неговата обновена верзија.

Ова изолирање содржи инструкции за создавање на вирусните протеини, кои се основа за правење на вакцините на „Фајзер“ и на „Модерна“.

Постојат дијагностички потврдени случаи на ковид-19 во целиот свет вклучително и во Република Северна Македонија. Постојат сведоштва од пациенти кои прележале ковид, сведоштва на членови на семејства кои изгубиле блиски како последица на ковид-19. Во такви услови, кога голем број семејства имаат свои блиски кои заболеле од коронавирусот и за жал некои од нив завршиле фатално, несериозно е да се кажува дека ковид-19 не постои како болест. Целиот свет направи глобални напори за справување со пандемијата, воведување вакцинални сертификати, ограничувања на движењето, различни начини на кои се патува и се присуствува во јавниот живот, со  цел да се намали трансмисијата на коронавирусот и да се заштити јавното здравје.

На веб-страницата на Владата поврзана со коронавирусот пишува дека:

Ковид-19 е заболување предизвикано од SARS-CoV-2, вирус од фамилијата коронавирус, првично откриен во Кина во декември 2019 година. Вирусот е причинител на акутно вирусно респираторно заболување. Ковид-19 примарно се шири преку капки на плунка или секрет од носот на заразена личност, кога тој ќе кивне или ќе кашла.

Медицински професионалци посочуваат на симптоми, на клиничка слика и на последици од болеста. Тие најдиректно во секојдневната пракса се соочуваат со пациенти кои лично ги лекуваат од ковид-19. Сите симптоми на ковид-19, болеста предизвикана од коронавирусот САРС-КоВ–2 може да ги погледнете на следниот линк. Исто така, постои можност и за состојба позната како долг ковид, која што се третира на Клиниката за пулмологија во Скопје. На овој линк на Вистиномер можат да се видат повеќе информации за состојбата наречена долг ковид.

Што се однесува на делот од постот што го рецензираме во кој се вели дека има „отровни лекарства“ за третирање ковид, тврдење што донекаде е контрадикторно. Имено, прво авторот на постот тврди дека нема ковид, потоа констатира дека има само лекарства за третирање на ковид, за на крајот да ги нарече отровни без да специфицира на кои лекови мисли.

На веб страницата на Светската здравствена организација наведени се сите третмани за третирање на коронавирусот.

СЗО има објавено и водич за детално користење на сите лекарства кои се одобрени за третирање ковид-19, тој е редовно ажуриран и истиот може да се погледне овде.

Сите лекови кои се користат во болнички услови пред да се одобрат подложни се на клинички испитувања и не постојат никакви индиции дека се отровни, наспроти тврдењата изнесени во објавата што ја рецензираме, кои се паушално изнесени.

Поради сите овие факти, оценуваме дека не е вистинито тврдењето во постот што го рецензираме дека ковид-19 не постои и дека лекарствата за негов третман се отровни.

 

 

 

 

 

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар