Вакцинацијата е клучна за пациентите со бубрежни заболувања

Од почетокот на пандемијата стотина пациенти со бубрежни заболувања кои се лекуваат во Специјалната болница за хемодијализа во Струга, заболеа од коронавирусот. Лекарите укажуваат дека кај овој вид хронични болни од исклучителна важност е да бидат вакцинирани против ковид-19. Тие се во категорија на тешки болни со голем број на коморбидни состојби и доколку не се вакцинирани можноста за лош исход и компликации е далеку поголема. Нашите пациенти се многу свесни, ја сфатија нашата порака и над 90 отсто од нив веќе се вакцинирани со две дози, а кај голем процент во тек е вакцинација со бустер доза, велат од Специјалната болница за хемодијализа во Струга

Фото: Вистиномер

Пишува: Соња Рилковска

 

Коронавирусот не ги одмина пациентите со бубрежни заболувања. Од стартот на пандемијата до денес стотина пациенти со бубрежни заболувања од Југозападниот регион во земјава, заболеа од ковид-19. Кај овој тип на хронични пацинети опасниот вирус бележи дури 20 отсто смртност, велат лекарите.

Обично пациентите со бубрежни заболувања развиваат тешка клиничка слика  и повеќето се на кислородна поддршка, па затоа вакцинацијата е клучна за нив.

 

За пациентите со бубрежна слабост и на дијализа од исклучителна важност е да бидат вакцинирани против ковид-19. Тие се во категорија на тешки болни со голем број на коморбидни состојби и доколку не се вакцинирани можноста за лош исход и компликации е далеку поголема. Нашите пациенти се многу свесни, ја сфатија нашата порака и совет, така што може да кажам дека над 90 отсто од нив веќе се вакцинирани со две дози, а кај голем процент во тек е вакцинација со трета бустер доза, вели за „Вистиномер“ д-р Вангелка Коваческа Шавревска, субспецијалист нефролог.

За разлика од лани бројот на ковид позитивни пациенти со бубрежни заболувања е далеку помал.

Токму поради вакцинацијата може да кажеме дека бројот на пациенти со хронични бубрежни заболувања, кои се позитивни на ковид е далеку помал. Имаме мал број на пациенти згрижени во ковид одделот. Со празниците стравуваме како ќе биде, очекуваме да има пациенти и сме подготвени да пружиме лекарска помош, вели д-р Ковачевска Шавревска.

Лекарите од Специјализираната болница за нефрологија во Струга велат дека подготвени се и за справување со евентуален наплив на пациенти со новиот сој омикрон.

Имаме посебна сала, изолирана за ковид позитивни пациенти со 10 дијализни апарати, тоа се фактички 20 пациенти на дијализа во еден ден. Најмногу во ист момент сме имале околу 15 пациенти, сега сме подобри, но не смееме да се олабавуваме. Новите соеви на вирусот уште побрзо се шират и опасноста нè демне сите , вели д-р Александар Попоски, супспецијалист нефролог и директор на Специјализираната болница за нефрологија Струга.

Бранкица Размоска (26) од Вевчани е една од пациентите на хемодијализа која заболела од коронавирусот лани во август. Ковид-19 ја врзал во болнички кревет еден месец.

 

На моја кожа ја почуствував силата и последиците на овој страшен вирус. Цел месец бев позитивна ми беше многу тешко. Примав инфузии, лекарства, дијализа…. Им верувам на лекарите, тие со години се грижат за моето здравје, се вакцинирав и ревакцинирав, а во јануари ќе примам и трета доза.Чекам да поминат 6 месеци од вакцинацијата, вели за „Вистиномер“ Размоска.

Тешките форми на болеста и лошиот исход се главно асоцирани со стареењето и присуството на одредени медицински коморбидитети, посебно хроничните болести и затоа за овие пациенти клучна е вакцинацијата, велат и од Асоцијацијата на специјализанти и млади лекари .

Една од мета-анализите составена од 18 студии која го компарираше придонесот на коморбидитетите кај пациенти заболени со ковид и степенот на клиничка манифестација, укажа дека хроничната опструктивна белодробна болест (ХОББ) како еден од испитаните коморбидитети е асоцирана со тешка форма на основната болест. По ХОББ, следат кардиоваскуларните, малигните и цереброваскуларните заболувања, но не изостануваат и хипертензијата, дијабетот и хроничната бубрежна болест, како причина за развивање на тежок степен на клиничка слика кај пациентите со ковид-19. Затоа од исклучителна важност е овие лица да бидат вакцинирани меѓу првите, како што впрочем и беа повикани. Но, не само за Sars CoV2, туку и за сезонскиот грип, бидејќи самите последици предизвикани од овие вируси (кои се асоцирани со пролонгирани хоспитализации, па се до фатални последици), се причина за зголемен товар на здравствениот систем, вели за „Вистиномер“ д-р Марио Јованоски од Асоцијацијата специјализанти и млади лекари.

Излезот од пандемијата и враќањето во нормалниот живот е во масовната имунизација. „Треба да бидеме среќни што имаме достапни вакцини и сите што поскоро да пристапиме кон вакцинација“, апелираат здравствените работници.

 

 

---

Овој напис е изработен во рамките на Проектот за брзо справување со вакциналните дезинформации, имплементиран од Фондацијата Метаморфозис. Тој е првично објавен во Вистиномер, а e овозможен со поддршка на Балканскиот фонд за демократија, проект на Германскиот Маршалов фонд на САД (BTD – The Balkan Trust for Democracy, a project of the German Marshall Fund of the United States). Содржината на написот е одговорност на авторот и не секогаш ги одразува ставовите на Метаморфозис, БТД или нивните партнери.

---

 

 

 

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар