Зачленете се во нашиот клуб на читатели и најновите текстови ќе ги добивате на вашата мејл адреса
Ветување: Во првите 82 дена од мојот мандат преку програмата за модерно Скопје со сите 15+1 проекти и мојот 82 акционен план ќе ги исчистиме дивите депонии во градот. Ќе го промениме линискиот ред на градскиот сообраќај, а редовни ноќни линии ќе бидат воведени, посебно за време на викендот, изјави Данела Арсовска, градоначалничка на Скопје во својата предизборна кампања.
Фото: skopje.gov.mk
[Извор: МИА, изјава на Данела Арсовска; Датум: 15.10. 2021 г.]
Два дена пред локалните избори кои се одржаа на 17 октомври 2021 година, актуелната градоначалничка на Скопје, Данела Арсовска, а во тоа време кандидат за оваа функција, вети дека во првите 82 дена од нејзиниот мандат ќе се вратат во сообраќај редовни ноќни линии на ЈСП, особено за време на викендот.
Арсовска тоа го напиша и во објава на Фејсбук:
Воведување редовни ноќни линии на автобускиот превоз посебно за време на викендот.
На 28 декември 2021 година, Јавното сообраќајно претпријатие Скопје, објави официјално соопштение во кое посочува дека од овој датум во функција се враќаат ноќните линии.
Почитувани корисници на јавниот превоз, Ве информираме дека од денеска, вторник (28.12.2021 год) почнуваат да функционираат ноќните линии и тоа: 2, 5, 7, 22, 24, 41, 50, 57 и 65В. Воведувањето на ноќни линии е почеток на промените за подобар јавен градски превоз што е дел од програмата на раководството на ЈСП и на градот Скопје. На овој начин за скопјани се обезбедува јавен превоз и за време на ноќните часови, што беше укинато како опција од минатото раководството на градот пред две години. Автобуските линии 2, 22, 24, 41, 57 и 65В, ќе сообраќаат секој ден, а останатите ќе бидат во функција во деновите од викендот или комбинирано, како и за време на празниците, објавија од ЈСП Скопје.
Прегледот на возниот ред и трасите на линиите е достапен на веб-страницата ЈСП, во делот ВОЗЕН РЕД/НОЌНИ ЛИНИИ.
Инаку, во минатото ЈСП повеќепати ги повлекуваше ноќните линии од сообраќај поради тоа што имаа многу слаба искористеност и носеа загуби за претпријатието. Економската неисплатливост беше посочувана како причина за нивното укинување, а низ годините тие повремено функционираа само за манифестации како Бела ноќ, кога во центарот на Скопје имаше поголема фреквенција на граѓани.
Со оглед на тоа што од 28 декември ноќните линии се вратени во функција – автобуските линии 2, 22, 24, 41, 57 и 65В, ќе сообраќаат секој ден, а останатите во деновите од викендот или комбинирано, како и за време на празниците, ветувањето на Арсовска го оценуваме како исполнето.
Оцени: Мирослава Бурнс
Овој напис е изработен во рамките проектот Проверка на фактите за напредокот на Северна Македонија кон ЕУ, имплементиран од Фондацијата Метаморфозис. Написот, кој е првично објавен во Вистиномер, e овозможен со поддршка на американската непрофитна фондација NED (National Endowment for Democracy). Содржината на написот е одговорност на авторот и не секогаш ги одразува ставовите на Метаморфозис, НЕД или нивните партнери.
Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар
Зачленете се во нашиот клуб на читатели и најновите текстови ќе ги добивате на вашата мејл адреса
