Средношколци од Крива Паланка ќе се обучуваат во Центар за дијализа „Диаверум“

„Диаверум е најнова во листата здравствени установи од приватниот сектор со која училиштето потпишува меморандум за соработка, и каде учениците ќе можат да се обучуваат за да бидат успешни медицински лица. Постојано сме во комуникација со сите институции и компании што можат да придонесат за поквалитетно практично усовршување на учениците од стручните паралелки и на идните средношколци им нудиме одлични услови за настава и надградба на знаењата“, вели директорката на СОУ „Ѓорче Петров“, Елена Ѓоргиевска.

Фросина Ефремовска, менаџерка на клиниката „Диаверум“ во Куманово и Крива Паланка, посочува дека како општествено одговорна компанија, покрај својата основна дејност - дијализа, нефролошки амбуланти и грижа за своите пациенти и вработени, постојано се спроведуваат и различни активности за подигнување на свеста на луѓето за сопственото здравје.

„Во Крива Паланка имаме соработка со локалната заедница, а со СОУ „Ѓорче Петров“ најдовме заеднички цели и идеи за учениците од медицинската струка. За нас соработката е можност да го пренесеме нашиот концепт на идните здравствени работници , а тоа е концепт на вистинска грижа и високо ниво на медицинска нега. За училиштето ова подразбира непосредна можност за едукација, пракса и поблиску запознавање на работата во еден современ дијализен центар, но и важноста на едукацијата, превенцијата и подигнување на свеста за здравјето, рече Ефремовска. 

За учениците од медицинска струка веќе е организирана посета на Центарот за дијализа во Куманово, а се планираат и активности поврзани со дијабетот и дијабетичарите во општината.