Водата во Крива река е сериозно загадена, вели градоначалникот Митовски

„Водата во Крива Река е сериозно загадена и спаѓа во најлошата категорија на загадени води, неупотреблива за било која намена“, истакна на прес конференција Сашко Митовски, градоначалник на Крива Паланка.

Анализите направени во Институтот за јавно здравје во Куманово покажале зголемени вредности на тешки метали, заматеност на водата и суспендирани честички од органско и неорганско потекло. Концентрациите на олово се за 3,6 пати поголеми од максимално дозволените, на манган за 3,8 пати, на цинк за 1,8 пати, а измерени се концентрации на манган од 2,158 микрограми на литар (мкг/л)- горната дозволена граница е 0,1 мкг/л. Заматеноста на водата е 170 единици од дозволените 10 гранични вредности, а присуството на суспендирани честички ја намлуваат пропустливоста на светлината во водотекот, што претставува опсаност за средината и живиот свет.

За Митовски индикативно е што овие вредности се зголемени по хаваријата во рудникот „Тораница“.

„Според А- интегрираната дозвола која ја поседува „Булмак 2016“ во својот процес користат токму кадмиум, цинк, олово, цијанид и останати соединенија кои се наоѓаат во Крива Река веднаш по хаваријата. Тоа е многу јасно и децидно се гледа токму од двете анализи кои ги имаме како релевантен доказ. Уште еднаш апелирам од надлежните институции да реагираат соодветно, без дополнителна задрашка. Јавното обвинителство да отвори постапка согласно кривичната пријава“, потенцираше градоначалникот Митовски.

Крива река беше загадена на 14 март  откако, поради пукање на цевка се излеала вода од рудникот Тораница. Подоцна, Министерството за животна средина ја казни фирмата со 200. 000 евра.

Крива река во близина на Куманово се влева во Пчиња, а потоа и во Вардар.