Црвено Куманово го прослави Денот на востанието

На свеченоста присуствуваа делегации на Сојузот на борците,кабинетот на претседателот, Собранието, Владата, локалната самоуправа,советот на Општината, АРМ, полицијата, јавните установи и институции,невладин сектор, училишта, политичките партии и граѓани, кои положија венци и цвеќе и оддадоа почит на загинатите борци во антифашистичката борба и НОБ.

 Пред присутните зборуваше првоборецот Спиро Зафировски, кој побара да не се заборава значењето на Комунистичката партија во формирањето на македонската држава, и ги повика граѓаните на сплотеност и единство, бидејќи во четиригодишната борба против фашистичкиот окупатор заедништвото била основната одлика со која успејале да го победат побројниот и посилен непријател.

Нашата војска беше прифатена од народот и добиваше секаква подршка, независно од нивната национална, политичка и верска припадност. Благодарение на таа подршка ние успејавме да извојуваме големата победа. Да не беше таа борба немаше да се случи ни АСНОМ, немаше да имаме денешната држава- рече Зафировски.

Тој ја искористи приликата да потсети за лошата состојба во која се наоѓаат спомениците на жртвите од НОБ, и побара од државата поведе повеќе сметка за нивно одржување.

Кога се градеа спомениците, државата беше посиромашна, но ги градеше и одржуваше. Сега кога матерјално сме многу побогати, сведоци сме дека спомениците пропаѓаат и за неколку години  целосно ќе ги снема ако не се презме нешто. Тие се нашата историја, и ние не смееме да бегаме од вистината.За нашите херои има споменици во соседните земји, а ние не сакаме овде да ги почитуваме и да ги одржуваме-рече Зафировски.

На присутните им се обрати и градоначалникот на Куманово Зоран Дамјановски, кој ги поздрави гостите и го искажа своето задоволство од големата посетеност на прославата на празникот и големиот јубилеј.Тој зборуваше за тешката борба на македонскиот народ во создавањето на сопствена држава, а се наврати и на евро-перспективите на земјата.

Ниту една слобода во историјата не била остварена еднаш за секогаш.Како што се знае за неа се бореа нашите предци, но со иста жар и поветеност, но со други сретства, денека и во иднина е потребна да се одржува за да не се напуштат историските и потврдените перспективи и да не се дозволи на ретроградните сили таа слобода да ја загрозат. Нема сомнение дека ако затреба нашите граѓани би ја бранеле нашата денешна слобода како што тоа го правеле нашите најдобрите синови и ќерки на овој народ. Заради својата историја, Куманово е град на оптимизмот, град на човечноста, мултуетнички град, со потврден соживот на своите граѓани. За такво и уште поразвиено Куманово им искажуваме чест на предходните генерации, кои ја втемелија нашата денешнина -рече Дамјановски.

На прославата немаше претставници од албанските партии во градот.