Голем одзив на уличната анкета за управување со отпад
За само еден час на Градскиот плоштад стотина граѓани доброволно се анкетираа и дадоа свое мислење за реализација на проектот за управување со отпад во Североисточниот регион.
Анкетарите се презадоволни од одзивот на кумановци. Во прашалниците граѓаните одговараа дали се запознаени со проектот за управување со отпад, дали знаат што е компостирање, селектирање на отпад, колку би одвоиле годишно од своите приходи за управување со отпад, дали лично би се вклучиле и слично.
- Има граѓани кои знаат, но има и такви кои не знаат за проектот. Ќе треба податоците да се обработат за да добиеме некаков официјален податок. Во план ни беше ако нема доволно интерес да работиме два дена, но веќе има сто прашалници и ќе завршиме за еден ден. Денеска паралелно се прави анкета и во Штип - вели Горјан Темелковски, експерт за животна средина.
Анкетата е дел од проектот за изработка на регионални планови за управување со отпадот и ја реализира консултантската куќа Енвироплан со своите партнери. Проектот се реализира со пари од ЕУ.
