Книгите да се враќаат навреме
Книгите позајмени од библиотека треба да ги вратат за 15 дена, а за задоцнување се наплаќа минимална сума.
Од градската библиотека “Тане Георгиевски“ објаснуваат дека имаат читатели кои се редови со враќање на книги, но честопати се случува ученици да земат лектира и да ја задржат подолго од предвиденото.
Рокот може да се презадолжи, уште 15 дена да се чува книгата.Највеќе имаме задоцнување кај средношколците, лектирите ги задржуваат подолго бидејќи не ги обработуваат секогаш во даден термин. Ние инсистираме тие да бидат редовни и книгите да циркулираат бидејќи на сите им требаат. Се случува да се задоцни, да се изгуби книга и тогаш тие сами плаќаат, наоѓаат, купуваат ист наслов за да го имаме и да истиот го пуштиме во оптег - изјави Мирјана Златановска, библиотекарка.
Кумановската библиотека има над 3000 редовни читатели и плус уште 1000 други корисници на библиотечниот фонд.
Ги враќам книгите, јас сум примерна, а за други не знам. Сакам да читам кога имам време, тоа ме исполнува. Читаат и моите дома. При една посета земам и по три книги и ги враќам за две недели - вели Олгица Думановска, читател.
Зајмувањето и раздолжувањето се евидентира електронски, а вработените во библиотеката апелираат читателите да се придржуваат кон рокот од 15 дена и да не доцнат со враќање на лектирите.
