Корејанци промовираа мир во Кумaново
Неколку граѓански активисти од Кореја заедно со членовите на Центарот за меѓукултурен дијалог денеска на градскиот плоштад ги промовираа вредностите на мирот.
Граѓаните имаа можност да кажат што за нив значи мир, а паралелно имаше повеќе интерактивни активности за младите.
- Во овој период низ целиот свет се организираат мировни маршови или мировни активности и идејата е заеднички да го дигнеме својот глас за да има поголем ефект. Денеска за Кореја е многу важен ден затоа што корејската војна е почната на 25 јуни 1950 година и овој ден е симболично избран за ден на мир. Имаме гости од Кореја кои од Албанија дојдоа овдека бидејќи имаше и таму ваков настан за мир - вели Матеј Маневски од Младински центар “Мулти - Култи“.
Гостите од Кореја рекоа дека ова за нив е интернационален проект и целта им е во многу земји да го промовираат мирот како вредност.
- Јас сум од Јужна Кореја и доаѓам од интернационална младинска организација која има 250 организации членки од целиот свет. Ние дојдовме овде за да го промовираме мирот бидејќи и Македонија е планирана како дел од овој голем проект - рече Клер Јаен Јанг од Кореја.
Корејците претходно ги посетиле Хрватска, БИХ и Албанија со истата цел, промовирање на мирот.
