Ловочувари и полицајци ќе ги “чешлаат“ ловиштата
Ловочувари од ловечките друштва заедно со полицајци ќе прават контроли во ловиштата со цел да се сузбие криволовот.
Ова беше договорено на денешниот состанок во СВР Куманово со претставници од ловечките друштва “Сокол“, “Шчипоња„ и “Фауна“. Полицијата предупреди дека конзумирање на алкохол кога се оди на лов и пукање надвор од ловиштето строго се забранува и ќе биде санкционирано. Доколку доаѓаат странски ловџии, тие во полиција однапред ќе треба да бидат најавени.
Од ловечките друштва се пожалија дека голем е бројот на луѓе кои поседуваат ловечки пушки, а не плаќаат чланарина и не се регистрирани кај нив.
Кај мене во село има 60 ловечки пушки, а плаќаат само 10 луѓе. Се случувало да фатиме 3 ловџии, и кажуваат дека се од друго друштво. Дозвола немаат, документи немаат. Да имаме соработка нема да има ловокрадци - вели Даут Емини, претседател на “Шчипоња„.
“Сокол“ под концесија има 12, а ловечките друштва “Фауна“ и “Шчипоња„ располагаат со по едно ловиште.
Најмалку два пати годишно ловечките друштва и полицијата ќе оддржуваат вакви состаноци со цел криволовот да се намали и да се зачува дивечот.
