Несовесни граѓани го злоупотребуваат бројот 194

Вработените во Брза помош Куманово се жалат дека тоа им ја отежнува работата и наместо да се посветат на вистинските пациенти, губат време со луѓе, кои немаат друга работа.

Имаме две линии и се случува да ги блокираат несовесни граѓани, а од друга страна на некој пациент можеби итно му треба помош, а не може да не добие. Штом некој упорно ѕвони три, четири дена, веднаш реагираме. Има и лажни повици. Ќе ни кажат дека на улица паднал човек, и кога таму ќе отидат вработените ќе видат дека такво нешто нема, па се враќаат назад - вели Марјан Спирковски, началник на Брза помош.

Началникот објаснува дека ваквите случаи ги пријавуваат во полиција, по што се реагира до мобилниот оператор и бројот се блокира. Но оваа мерка само привремено дава резултати, бидејќи истите луѓе земаат нов број и повторно ги користст линиите непотребно, се јавуваат и ги навредуваат вработените.

- Често поднесуваме поплаки до полиција, но сега има броеви кои можат да се купат во трафика и таму за корисникот не се бараат лични податоци-додава Спировски.

Тој објаснува дека не секогаш се работи за тинејџери, линијата ја злоупотребуваат и посериозни граѓани.