Од “Наце Буѓони“ најдобри во знаење за ЕУ

На натпреварувањето учествуваа шест екипи од средните училишта во градот, кои посетуваат настава на македонски и албански јазик. Учениците ги проверуваа своите знаења за основањето на ЕУ, нејзините земји членки, начинот на функционирање и слично.

Се подготвувавме доста време. Натпреварот е во групи. Информациите кои ги научивме ќе ни користат, тоа е од општа култура, тоа секој треба да го знае. Не е работата само да се покажеме на овој натпревар, туку и понатаму да го користиме ова знаење - рече Дарко Медарски, ученик  во Гимназија “Гоце Делчев“, учесник на квизот.

Со ова натпреварување учениците го одбележуваат утрешниот ден, 9 мај - Ден на Европа.

 Материјалот од кој учат е брошурата на Паскал Фонтен, со лекции како и зошто настанала ЕУ, како функционира, кои се нејзините институции и тела. Кои се предизвиците на ЕУ во денешно време и голем број други прашања. Квизот се прави во рамки на часовите по историја и граѓанско право  - вели организаторот Светлана Илиевска Алексовска.

Овој квиз се организира пет години по ред во соработка со Инфо точка, од секторот за евроинтеграции при Општина Куманово.