Поплавите ги поскапеа овошјето и зеленчукот
Заради поплавите во Србија и БИХ, каде производството е уништено и има потреба од увоз, овошјето и зеленчукот оваа година ќе бидат поскапи на нашите пазари.
Трговците велат дека токму од овие причини ова лето пиперките и доматите нема да бидат поефтини од 30 денари за килограм.
- Тие поплави секако ќе имаат влијание на нас. Ќе има извоз на пипер, патлиџан, компири, општо на сите земјоделски производи. Квалитетните домати и пиперки ќе се движат од 30 до 50 денари. Таа цена за купувачите ќе биде скапа бидејќи немаат пари - вели Сашо Стојановски, трговец.
Моментално пиперот и доматот чинат 50 денари, а зелката и краставицата се 25 денари за килограм.
- Извоз треба да има бидејќи и тие луѓе таму треба да живеат, да се хранат. Цените ќе бидат нешто повисоки, и нема да им одговараат на муштериите, ама што е тука е и ќе мора да се прилагодат - рече Јаворка Илиевска, трговец.
Се очекува и во регионот драстично да поскапат овошјето, зеленчукот и житариците.
