Крива Паланка по третпат ја организира „Сусурига“ за Прочка

Настанот има за цел да ја оживее вековната традиција поврзана со празникот на прошката, симболиката на обновувањето и заедништвото, како и да придонесе кон зачувување на нематеријалното културно наследство.

Програмата започнува во 12 часот со дефиле од плоштадот „Карпошово востание“, по што во 12:30 часот на Градскиот плоштад ќе следува централниот настан. Пред публиката ќе продефилираат маскирани и обредни групи од земјата и регионот: „Странчинарски игри“ од Мокриево, Ново Село, „Ратевски Бамурци“ од Ратево, Берово, „Суроварска група“ од Вискјар, Перник, Бугарија, „Џоломари“ од Манастирец Росоман, како и локалните групи „Паланечка свадба“ од КУЗ „Карпош“ и „Трновски ветришта“ од КУЗ „8 Октомври“ при НУ Центар за култура Крива Паланка.

Организатори на манифестацијата се Општина Крива Паланка и Фондацијата „Со срце за Крива Паланка“.

Со „Сусурига“ градот ја продолжува традицијата на одбележување на Прочка, обединувајќи ги граѓаните околу обичаите што со векови се пренесуваат од генерација на генерација.