Дополнителни ленти на Табановце за патниците на ЕП во ракомет

 На вчерашниот состанок меѓу претставници на двете гранични полиции биле договорени и мерките кои ќе се преземаат за излегување во пресрет на македонските државјани кои ќе патуваат за претстојното европско првенство во ракомет. Со мерките е предвидено отворање на три дополнителни ленти за излез од Р. Македонија, како и на дополнителни ленти за влез од српска страна.

Според досегашните информации најголема фреквенција се очекува во текот на утрешниот ден од 10.00 до 15.00 часот за кога се најавени 20-тина автобуси и комбиња, како и поголем број на патнички возила. Навивачите кои ќе патуваат организирано од српска страна ќе бидат пречекувани и проследувани од српската полиција, додека од македонска страна на граничниот премин „Табановце“ ќе биде распореден и еден во од Единицата за брзи интервенции, доколку се јави потреба или има некакво нарушување на јавниот ред и мир. Покрај режимот, на состанокот е договорено двете гранични служби да ги координираат активностите и континуирано да разменуваат информации- соопштуваат од МВР.

Дел од граѓаните веќе почнале да го користат новиот режим на патување и да заминуваат кон Ниш, така што околу пладне на граничниот премин „Табановце“ веќе се упатиле 10-тина автобуси, но и поголем број возила на кои во шест ленти им се овозможува излез од земјава, а просечното време на чекање е околу 30-тина минути.