Градоначалникот се сретна со професори од Франција

Гостите ги прими градоначалникот Зоран Дамјановски, кој им објасни дека Куманово е најголема општина во државата, со 22 училишта и вкупно 24.000 ученици.

- Мило ми е што имате добра комуникација. Ние во две училишта во градот, гимназијата и во ОУ “Крсте Мисирков“ имаме билингвални паралелки во кои се изучува францускиот јазик. Благодарение на таа добра врска со француската држава, многу деца отидоа да студираат во Франција и да стекнат пошироко знаење. Локалната самоуправа дава поддршка на ова збратимување - рече Дамјановски.

Директорот Љубиша Николиќ објасни дека посетат на Французите ќе ја искористат за да ги согледаат карактеристиките на образовниот систем во двете држави и да разменат искуства за културното наследство.

Ќе има проекти во сите области, првично размена на студенти и професори. Може ќе се создадат и мостови на соработка во стопанството - истакна Николиќ.

Професорите рекоа дека се пријатно изненадени од гостопримството на луѓето овде, а пред да пристигнат тука не знаеле многу за нашата земја.

- Нашата Гимназија има 850 ученици и 80 професори. Ние сме на 200 км северно од Париз. Во април 20 наши ученици ќе дојдат на размена. Овде учениците на час беа многу внимателни, слушаа, откривме многу и сакаме повторно да дојдеме - изјави Изабел Февро.

 Професорот Франк Делануар, вели дека кај нив учениците не се наклонети многу кон странските јазици, го изучуваат најчесто англискиот јазик, најмногу го сакаат шпанскиот и поретко се учи и германски јазик.

Наставниците престојот го привршуваат со посета на Скопје.