Монтажен пешачки надвозник бараат слепите лица

Тие тврдат дека само така ќе стигнат безбедно до Зелениот пазар и притоа ќе ги избегнат автомобилите оставени на тротоар и сообраќајниот метеж.

Десетина луѓе живеат во тој дел кај пазарот и имаат потреба секојдневно да ја поминуваат улицата. Тоа не би било некоја голема инвестиција. Овој проблем секаде е присутен, во сите градови. Јас кога се движам со бел стап, возачите застануваат, не сум имал лошо искуство, а за другите не знам. Во Куманово требаше да се отвори и Инфо центар, каде ќе добиваат информации слепите за она што ги интересира, а уште ништо нема. Хартија се трпи, ама многу споро се работи - вели Бобан Краљевски, претседател на Здружение на слепи лица Куманово.

Слепите лица велат дека во градот недостасуваат звучни семафори и патеки за слепи. Членовите на локалното здружение потврдуваат дека многу малку се вложува за нивните потреби.