Од Куманово тргна караванот „Отворени денови“ на Царинската управа

Најголемо внимание предизвика пронаоѓањето скриена стока од страна на куче трагач, но не помалку интересни беа и останатите активности, кои беа проследени со големо љубопитство од присутните.

Директорот на Царинската управа, Бобан Николовски, вели дека токму тоа им била и целта – да ја приближат својата работа до граѓаните, особено до младите, кои се иднината на земјата и допрва ќе размислуваат за избор на професија.

„На овој начин ја прикажавме работата на оперативното одделение при Секторот за контрола и истраги, кое е активно 24 часа. Со ова сакаме да го смениме начинот на размислување на граѓаните кон Царинската управа и обратно, бидејќи сите граѓани се дел од царинска постапка при секое преминување на границата“, изјави Николовски.

Тој потсети дека со откривањето и спречувањето на нелегални дејствија, Царинската управа не само што ја штити домашната економија, туку и ја подобрува финансиската состојба на државата, што особено се покажало во последните две години преку реални, мерливи и видливи резултати.

„Со тие средства граѓаните добиваат подобри патишта, нови автопати, болници и училишта, а истовремено се спречува влезот на наркотични средства, оружје и нелегални лекови. Затоа ни е неопходна поддршка и партнерски однос со граѓаните“, додаде Николовски.

Во Царинската управа активно се работи и на бројни проекти за дигитализација, кои ќе ја зголемат ефикасноста во работењето на царинските службеници.

Караванот „Отворени денови на Царинската управа“, кој започна од Куманово, ќе продолжи и во други градови во земјава по повод 14 април – Денот на Царинската управа.