Зачленете се во нашиот клуб на читатели и најновите текстови ќе ги добивате на вашата мејл адреса
Лична асистенција на деца со попреченост и дневен центар за индивидуална работа со дечиња од 5 до 12 годишна возраст, се двете бесплатни услуги кои ги пружа Здружение за развој и промоција на инклузивно општество „Инклузива“ во реновираниот објект на поранешната месна заедница „11 Ноември“ во Куманово.
Центарот во моментот го посетува 41 дете кое добива индивидуални услуги, а тимот го сочинуваат 2 логопеди, 1 социјален едукатор-рехабилитатор, психолог и социјален работник.
„Она што ме радува е тоа што дечињата се пуштаат од родителите да дојдат тука и едвај излегуваат од овој центар, што значи дека овој објект им ја дава неопходната услуга, но и ја чувствуваат љубовта која ја пружаме секојдневно“, истакна Благица Димитровска, претседателка на здружението.
Новиот објект е опремен со кабинет за индивидуална работа за лична асистенција и соба со сензорни елементи за развој на грубата моторика, развивање на концентрација и ментална стимулација, како и одредени вештини кај децата со попреченост. Постои и смирувачка соба со пријатна музика, светлосна стимулација за вознемирените деца.
Објектот е во сопственост на Општина Куманово, даден на користење на здружението, и реновиран за потребите на новата намена. Поставени се и пристапни рампи по сите стандарди и критериуми.
Објектот е реновиран и опремен со средства обезбедени од Општина Куманово преку Програмата за социјална заштита, приватни компании и поединци од градот.
Зачленете се во нашиот клуб на читатели и најновите текстови ќе ги добивате на вашата мејл адреса
