Кумановските пожарникари добија противпожарно возило донација од Австрија

Со оваа донација, возниот парк на кумановските пожарникари е збогатен со седмо противпожарно возило, со што значително се подобруваат капацитетите за интервенција при пожари и други вонредни ситуации.

При примопредавањето на возилото, командирот на ТППЕ Куманово, Борис Станковски, оствари средба со покраинската министерка за цивилна заштита и заштита при катастрофи Астрид Маир, како и со раководството на аеродромот во Инсбрук и командирот на аеродромската противпожарна бригада.

Во рамки на посетата, претставниците на ТППЕ Куманово поминаа петдневна обука за ракување со новото возило, а се запознаа и со организацијата и функционирањето на доброволните противпожарни друштва во Австрија и Хрватска.

Од ТППЕ Куманово истакнуваат дека поддршката од меѓународните партнери е од големо значење за модернизацијата на единицата и за понатамошно унапредување на нејзината подготвеност и ефикасност при справување со пожари и други интервенции.