Матичните лекари во Куманово со предупредувачки штрајк

Матични лекари од Куманово денеска стапија во едночасовен предупредувачки штрајк, поради измените во системот на „Мој термин“. 

Се решиле на ваков чекор затоа што добиле наредба за секој пациент да имаат верификуван телефонски број.

„Не можеме да креираме ниту упат ниту рецепт, доколку преку смс порака, бројот на мобилен телефон на пациентот не добие код за автентикација од системот. Имаме пациенти кои немаат мобилни телефони, имаме такви кои често го менуваат и се префрлаат од еден на друг оператор, имаме луѓе со деменција, моторни нарушувања кои не можат да користат телефон, има и такви кои не сакаат да остават број. Зошто треба на секои неколку месеци да ги проверуваме пацинетите кој им е телефонскиот број“, истакнува д-р Фатмир Асани, претседател на Здружение на матични лекари Куманово.

Без претходна најава од денеска стартувала експерименталната фаза, а целосна имплементација е предвидена веќе за понеделник, 3 март. Тоа практично значи дека пациентот освен преглед, не може да добие никаква друга услуга од матичниот лекар, на пример упат за лабораториски услуги, специјалистички преглед, комисиски преглед, или пак рецепт за било кое хронично или акутно заболување.

Матичните лекари сметаат дека не е нивна работа да ги проверуваат податоците на пациентите и колку се достапни за установите од секундарната или терцијарната здравствена заштита.

Доколку не се изнајде решение со надлежните матичните лекари нема да работат на 3 март, понеделник.