Словенечките и кумановски пчелари заеднички против производителите на неквалитетен и фалсификуван мед

Заеднички настап  против производителите на неквалитетен и фалсификуван мед, како и размена на искуства во одгледувањето пчелни семејства и висококвалитетно производство на мед биле главните теми на заедничката средба на кумановските пчелари од Здружението „Пчела“ со нивните колеги од Словенија кои престојуваа во кумановскиот регион.

Околу 50 словенски пчелари, предводени од претседателот на Пчеларскиот сојуз на Совенија, Боштијан Ноч , кој воедно е и претседател на  Европскиот сојуз на пчелари, го посетиле пчеларникот на Бобан и Сашо Стошевски во Драгоманце. Тие одржале и состанок   каде станало збор за напливот на мед со сомнителен квалитет и начинот како да се спречи нивното присуство на пазарот.

Заклучокот на искусните пчелари од двете држави  бил дека само со едукација на купувачите и јавноста, но и на самите производители за нормативите и правилата за собирање на мед ќе се одржи високо ниво на квалитет, но и довербата кај купувачите. А притоа да се започне со „прочистување“ на сопствените редови.

„ Во здружението во Куманово имаме 130 члена, а можеби има 150 пчелари кои не се наши членови. Секако дека меѓу 300 лица можно е да има секакви производители, иако јас не можам да посочам конкретно никого. Но, сум слушнал дека мал производител, со мал број на кошници, продава мед цела година, што едноставно е невозможно“, објаснува Бобан Стошевски, претседател на Здружението на пчелари „Пчела“ од Куманово, домаќин на настанот.

На заедничкиот состанок било  потенцирано дека најбитно е активното  вклучување на државните институции , како што се  инспекциите и  агенциите за контрола на квалитет и дека само со заеднички напори може да се стави крај на малверзациите на пазарите.

Словенечките пчелари го застапуваат и пропагираат правило, да се купува мед од човек кој го познаваш, а претседателот Ноч ја потенцирал важноста на етаблирање на пчеларите најпрвин на домашниот локален пазар.

„Иако се земја членка на Европската унија и соработуваат со колегите од другите земји на простор без граници,словенечките пчелари се  најконцентрирани на домашниот локален пазар. И таму и тука важи правилото - за да сте сигурни во квалитетот на медот,  купувајте од производител што го познавате и во кој имате доверба“, го потенцира заедничкиот став Стошевски.

Посветеноста на локалното производство и локалните потрошувачи, Стошевски го  илустрира со примерот на  Јожо Штркељ, 80-годишен пчелар од Словенија .

„За секоја организација околу престојот во кумановскиот крај, инсистираше да се ангажираат кумановски превозници и локални сместувачки капацитети. Исто и во однос на храната, беше испланирана целосно органска трпеза, со земјоделски и сточарски производи на жителите од Драгоманце, Врачовце и Младо Нагоричане,кои заедно со членовите на здружението и нивните семесјтва, учествуваа и во подгототвката на локалните специјалитети “, објаснува Стошевски.

На состанокот на пчеларите присуствувал и амабасадорот на Република Словенија во Македонија, Грегор Пескар, пчелари од Пчеларското здружение „Пчела“ од Куманово, претставници од здружението „Матица“ од Скопје, како и претседателот на Сојузот на пчеларски здруженија од Македонија , Менде Трајковски од Битола.

За пречекот и презентацијата на производителите на мед, кумановските пчелари добиле највисоки оценки од словенечките колеги и добиле покана за посета на словенечкиот  саем на мед, кој традиционално го организираат во мај.

Пчеларите од Куманово, пак, немаат време за одмор и веќе се подготвуваат за традиционалниот саем на мед, кој е закажан наредниот викенд, во пресрет на празникот „11 Октомври“.