Ќе се собира кабаст отпад во Агино Село, Черкезе и Режановце

Контејнери се поставени во близина на црквата во Агино Село, на влез од селото Черкезе и на пат кон селото Режановце, поточно на излезот од станицата за технички преглед. Акцијата е предвидена да трае од денска до сабота, 3 мај.

Од јавното претпријатие апелираат до граѓаните да ја искористат можноста за одлагање на старите, кабасти работи од домовите без дополнителна надокнада.

„Очекуваме голем одѕив, масовност и успешна акција, жителите на руралните средини се секогаш дисциплинирани во тој поглед. На овој начин ќе се ослободат од сметот без да ја загадат животната средина во нивна непосредна околина“, истакна директорот Ненад Стојановски.

За разлика од минатите години, оваа пролет акцијата вроди со плод, имаше поголем одзив од последните неколку години. Домаќинствата се ослободија од старите нефункционални апарати и машини, оштетени парчиња мебел, пластична амбалажа и стари, автомобилски гуми. Акција прво се организираше во градот, потоа беа опфатени приградските населби, за на крај да се одржат и во дел од селата.

Ова е трет дел од кампањата, спроведена по насоки на Министерството за животна средина и просторно планирање. ЈП „Чистота и зеленило“ по пролетното чистење на отпадот со поголем волумен, ќе продолжат и со самостојна организација на вакви акции кон крајот на летото и почеток на есента. Нивното искуство покажува дека најголем успех во спроведувањето имаат во септември, па за тогаш се предвидени уште 2-3 нови акции.