Ќе се вади асфалтот на „Моша Пијаде“ – граѓаните да не паркираат во зоната каде што се работи

„Во претстојниот период ќе се отстрануваат постојната асфалтна конструкција и рабниците по целата ширина и речиси по целата должина на улицата. Пристапот за возила ќе биде отежнат сè до создавање услови за повторно воспоставување на сообраќајот. Оваа постапка е неопходна заради безбедно движење на граѓаните и возилата, како и за непречено и безбедно извршување на градежните работи“, информираат од Општина Куманово.

Првата фаза од реконструкцијата на улицата „Моша Пијаде“ започна во мај минатата година, а досега е завршена реконструкцијата на водоводната мрежа на потегот од „Пијано Престиж“ до УЈП.

Според проектот, ќе биде реконструирана или заменета целокупната подземна инфраструктура на улицата, а ќе бидат поставени и нови електрични и оптички инсталации. Во должина од 830 метри ќе се изгради нова атмосферска канализација со профил Ф-1000. На дел од улицата ќе бидат заменети и водоводната и фекалната канализациска мрежа, бидејќи постојната инфраструктура е стара повеќе од 50 години.

Изведувачот и надзорниот орган се избрани од Владата, а проектот се реализира преку Министерството за транспорт и врски и Светската банка, во соработка со локалната самоуправа.