Куманово со „Срце за 63 светлини“ им оддаде почит на жртвите од Кочани

Во спомен на жртвите светлата на Градскиот плоштад симболично беа изгасени во траење од 63 секунди, a беа запалени свеќи, со молитва и надеж дека ваква трагедија никогаш повеќе нема да се повтори. Воедно беше испратена и порака за поддршка до родителите – дека не се заборавени. 

На настанот присуствуваа градоначалникот на Општина Куманово, Максим Димитриевски, како и претставници од општинската администрација.

Настанот „Срце за 63 светлини“ го организираше Фондацијата за култура и спорт Куманово, со поддршка на Општина Куманово.

Во пожарот во дискотеката во Кочани загина и музичарот Филип Стевановски од Куманово, член на групата „ДНК“. Стевановски беше продуцент, пијанист, тромбонист и композитор, магистер по џез студии и директор на Центарот за култура „Ацо Шопов“ во Штип. Тој беше и уметнички директор на Џез фестивалот во Куманово.

Своето музичко образование го стекнал во Македонија, а како пијанист и тромбонист се доусовршувал неколку години и во САД. Завршил два факултета – џез и класична музика.