Марија Спасовска нова директорка на Кумановската библиотека

Таа е дипломиран филолог по македонски јазик и јужнословенска книжевност, со дополнително положени стручни испити за наставна насока и библиотекарство, а во струката работи 20 години во ОУ „Браќа Миладоновци“.

Специфичниот, библиотекарски дел од работата и е добро познат, а предизвик ќе и биде менаџерскиот дел од обврските.

„Имам солидно познавање и од справување со финансиските и правните аспекти од позицијата, но се уште сум во процес на запознавање со обврските, правилата, законите и моите нови колеги, иако со голем дел се познаваме и претходно. Моите планови, освен кон основната дејност, набавка на нови книжевни изданија, се насочени кон промоција на писатели, промоција на наградени книги на книжевни конкурси, интерактивни работилници со децата од основните и средните училишта од Куманово“, кажа директорката Спасовска.

Таа доаѓа на местото на Христина Алексовска, на која и истече мандатот, а не конкурираше за продолжување на извршување на функцијата.