Кумановецот Никола Милосковски ја сними првата песна „Стари мој“

Музиката и текстот се на Емел Франца, а аранжманот е на Кристијан Јовановиќ. Спотот го сними Алек Тасевски на повеќе локации во Скопје.

„Станува збор за балада која уште на прво слушање плени со својата искреност, топлина и мелодичност. „Стари мој“ носи силна емоција и лесно допира до секој што знае што значи вистинска љубов. Ова е композиција во која многумина ќе се пронајдат – особено оние што љубат искрено и без задршка“, вели Никола.

Песната е снимена на српски јазик, со цел да допре до поширока регионална публика. Сепак, не е исклучена можноста наскоро да добие и македонска верзија.

Никола најчесто настапува во својот роден град Куманово, а неговата музичка приказна полека се шири и надвор од границите – со настапи низ Македонија, но и во Србија.