Општина Куманово лани исплатила 47.000 евра оштета на граѓани каснати од куче

Општина Куманово во 2024 година исплатила 2.884 милиони денари или 46.900 евра отштета на граѓани кои биле каснати од кучиња скитници.

Во сумата се вкалкулирани и исплатените адвокатски трошоци, но не добивме одговор на колку лица им е исплатен надоместок.

„Не може да се дадат точни податоци за тоа на колку граѓани се исплатени од причини што предметите се по жалба до Апелационен суд Скопје, за кои се чека конечен одговор. Постапката за надомест за штета за повреда на лични права од каснување на куче скитник се води пред Основен суд Куманово кој е надлежен да ги цени приложени докази и неоснованост на тужбено барање и одлучува за надомест за штета“, стои во одговорот на општинските служби.

Најмалата исплатена сума минатата година изнесувала 40.000 денари, најголемата 65.000 денари. Само едно од поднесените барања е отфрлено како неосновано, а процесите се водат пред Основен суд Куманово.

Општина Куманово во 2022 од својот буџет на граѓаните им исплатила 1.290.685 денари или 21.000 евра, а во 2021 година  845.204 денари или околу 14.000 евра.

Во билтенот на СВР Куманово речиси и да нема ден кога нема пријава за каснување од куче.

Во Куманово нема стационар за згрижување на напуштени животни, а дел од активисти и љубители на животни волонтерски згрижуваат кучиња и ги лекуваат со донации.

Пред секои избори политичарите ветуваат дека во Куманово ќе се отвори прифатилиште за напуштени кучиња како во другите градови, но локалната самоуправа троши 1 милион денари само за заловување и третман.

Граѓаните сметаат дека со парите кои се плаќаат како општета на граѓаните и за заловување на кучињата, може да се најде похумано решение на проблемот со големиот број на напуштени животни кои гладни и болни талкаат по улиците.