Со новиот закон, граѓаните ќе можат кај матичен лекар да потпишат изјава за дарување органи

Од Министерството за здравство велат, дека од досегашната примена на законот произлегла потребата да се направат измени и дополнувања во насока на проширување на кругот на лица кои можат да бидат живи дарители на органи. Со олеснување и измена на административните постапки ќе се овозможи секој граѓанин со изјава кај својот матичен лекар да се определи за потенцијален донор на органи по смртта. 

„Ова е уште еден чекор во насока на подигнување на јавната свесност за значењето на органдонорството, како највисок акт на човекољубие со кој се спасуваат човечки животи. Целта е волјата на граѓанинот да биде примарна, системот да биде потранспарентен и подоверлив, а личната одлука да се врати таму каде што ѝ е местото – кај самиот човек“, појаснува министерот Алиу.

Предвидено е и воведување национална листа која ја води Министерството за здравство во „Националниот систем за електронски евиденции во здравството“, како и други административно-технички доуредувања на законскиот текст, информираат од Министерството.